piraña hat geschrieben:g.
mmmhhh?
was wäremer ohni oisi gedanke?
mir isches egal, wora en mänsch glaubt, zu welere religion er sich zueghörig fühlt, was er unter gott verstaht,... solang er/sie demit niemerem schadet (demit, wie er sin glaube, sini religion, usläbt). es git sonen usdruck defür: wer heilt, hat recht. i wür das no chli andersch beschribe. rächt ha isch relativ. aber wänn öper oder öpis heilt, dänn isch das wunderbar. und glaube cha heile. wämer bi sich blibt (und glichzitig us sich usegat, aber nöd versuecht, andri dur missionarisches gschwätz vo öpisem z überzüge). glaube cha sicherheit gä, heile, erkänntnis ermögliche, wäg zu sich sälber ufzeige,..., egal a was mer glaubt.
d essänz vo allne religione isch doch di glich. i vilne alte völker hät mer d sunne verehrt, wil si läbe ermöglicht hät. sunne = liecht = füür = energie = liebi (also ganz so eifach isches nöd, aber das wür glaub z wit füere...). d essänz vo allem, wämmer alles materielle und konstruierte und all "folgeerschinige" wäglat, isch d liebi. und die liebi cha nur flüsse, wänn di kosmischi ordnig nöd verletzt wird. also bildet d ornig en rahme für d liebi, dass si alles cha umfasse. was dänn mit de uslegig vo de religione passiert isch (und immerno passiert), hät nöd eigetli mit religion z tue. i bi konfessionslos ufgwachse (und froh drüber, ha dara au nüt veränderet) und früener d bible abglehnt, obwohl i no nie drin gläse ha. igendwänn im gschichtsunterricht hämer dänn passage aglueget und i ha müesse zuegä: wämer dehinter lueget, isch d bible voller weisheite. s chunt halt eifach chli druf a, wie mer die text usleit.
känneder d "ringparabel"? si isch en teil vo "nathan der weise" vom g. e. lessing (händ sicher di meischte i de schuel mal gläse...). wunderbar simpel und so ussagechräftig...
i finde, es git so vil weisheite, so vil religione und kulture, wo all unglaublichs potential händ. min wäg füert mi zu dene erkänntnis, wo für mis läbe e rolle spiled. i mache mini erfahrige, lärn nois känne und so entstaht das, wo ich läbe. wänns i gspröch um schamanismus, um energie und geischter, um schwingige und wälle, um liechter und feeä und dämone, um ahne, um contomblé, um curanderismo, um urchreft und spiritualität gange isch, bini scho oft gfröget worde: glaubsch du a das? - nei, ich glaub nöd dra, ich fühles, ich gspürs, ich xes, ich ghörs, ich erläbs, ich läbes. ich nimes wahr. und alles, wo du wahrnimsch, isch automatisch wahr/realität. mag si, dass die wahrheit nur für dich exischtiert, vilich au nur i dem momänt. morn isches vilich scho wider andersch und für all andere um dich ume isches vilich andersch. aber du würsches nöd wahrnäh, wäns nöd da wär (uf welere ebeni au immer...). e andri beobachtig, woni mache: spiritualität wird mode. und vili nänned bi ihrne inträsse "spiritualität/esoterik" (mag si, dass i das au scho gschribe ha), aber im grund gno isch das doch nöd eigetli es inträsse (im sinn vo hobby oder so), sondern en läbensinhalt...
dadezue giz no was anders: i bemärke so zwei tendänze i "oisere gsellschaft". di einte lehned alles "übernatürliche" (wüsseschaftlich (no) nöd erchlärbare) ab. di andere praktiziered all mögliche esoterische technike. bi letschtere giz widerum zwei usprägige: di einte wüssed, um was es gat, gspüüred s liecht und d liebi und händ en zuegang zu parallelwälte/zu sich sälber/zu ihrne ahne/zu geischter/zu energie. für di andere isches eifach mode. i weiss zwar praktisch nüt über de mike shiva, aber wos dänn sogar inre studiziitig es interview gä hät, hani gfunde, i muess das doch glich mal läse... und dänn seit er: "mer döf das alles ja au nöd zu ärnscht ne."
=> d lüt xend sonen typ, wo behauptet, charte z legä und i d zuekunft z luege und
und di einte (wo warschindlich wükli chli am läbe verbiläbed...) vergöttered ihn und lüted a und himmled ihn a (lut ihm hät er ja x verehrerinne, kei ahnig, was mer ame maa cha finde, wo null männlichi inneri ufrächti haltig und energie usstrahlt, aso entweder han ich da en blinde fläck oder die gwüsse fraue... ach lömer das blibe...
), di andere aber, wo chli was im hirni händ, die dänked sich: was für en vollidiot => mike shiva assoziiert mit spiritualität => mike shiva = vollidiot => spiritualität = vollidiotismus
und das isch schad. wil er isch gnau eine vo dene, wos nöd ärnscht nämed (er giz sogar zue), da isches ja klar, dases so usechunt... und wil er eine isch, wo chli bekannter isch (wüklichi schamane/heiler händs nöd nötig, sich sones fanpublikum ufzbaue, si heiled dur ihri fähigkeite und fertigkeite und d lüt chöemed zu ihne, wils wüssed, warum), entstaht es völlig abstruses und irrwitzigs bild vo spiritualität. und dademit verbunde au vo vilne mänsche e ablehnig degäge (wils ja nie erfahre händ, was spiritualität eigentlich isch)...
i glaub, i bi chli vom thema abcho
zum thema chile: i findes mängisch au chli übertribe, wie da gäld zum fänschter usegschmisse worde isch für die gebäude. anderersits isches faszinierend, sonen ruum z beträte. chile sind oftmals a ort baut, wo früener rituelli chraft- und heilort xi sind (z. b. vo de kelte und germane), wo ganz spezielli energie flüssed. es sind nöd eifach nur die gebäude. s eigetliche christetum beschäftigt sich ja au mit sotig übernatürliche chräft. es git nöd eifach nur gott als vater und dänn jesus und heilige geischt. au im ursprüngliche christetum giz no viles meh. und gott isch i dem sinn en usdruck für s unfassbare, allumfassende. für s liecht und d liebi.
möcht no was schribe zum buddhismus: au darüber weiss ich nöd sehr vil, aber vo dem, woni gläse/ghört/xe ha, gfallt mer einiges. es git allerdings (mind.) ein aspäkt, mit dem ich mi nöd cha identifiziere: es schint mer, als gächs im ganze läbe i dem körper uf dere ärde nur darum, guet uf de tod vorbereitet z si. askese, vo sünde befreit läbe. da fählt mir chli s urnatürliche. und de spass. de gnuss. (s git dadezue im forum ja scho gnueg biträg...
)
dänn giz no santo daime, dadevo hät no niemer gredet. die religion hät ihre ursprung zwar au im christetum und dementsprächend gaz i de ritual-lieder vil um mueter maria, de heilig geischt, jesus,... aber es wird vil me au d natur mit ibezoge. la luna, flor de cristo, besaflor (kolibri hät e trägendi bedütig im santo daime),... mueter maria wird allerdings verehrt als santa maria (und mer lat sich währed curas oder concentracaos au vo santa maria verfüere...
). was ich wunderbar finde: jede isch willkomme. mer muess nöd offiziells mitglied si, zum döfe debi z si. anderi religione wärded nöd abgwärtet oder bewärtet oder ver-/beurteilt. es isch wies isch und es isch guet so
du bisch immerno am läse? dänn nimmts mi wunder, was dezue z säge häsch (und falls nüm am läse bisch durchus au
) vilich nim ich mir dänn au zit, die gedanke, wo ich da so chli akratzt ha, no detaillierter oder usgwiteter oder präziser z formuliere...
aho hermanos
ahe hermanas
p.s. und jaaaa, sex isch geil (s isch zwar chli... närvig oder so, wämmer inre wise lit und überall wird mer vo mugge gstoche oder vo gras in a*** piekst... aso vo wisegras..., aber geil isches so oder so...)