mysticalforum

Dä Uusflug hät sich allemal glohnt! Scho dia mindeschtens 10 Rägeboga zwüschet Sargans und Dornbirn sind än ächta Hingucker gsii. Wo miar denn in Dornbirn abboge und immer tüüfer in Wald cho sind, hani mi gfragt, ob miar jetzt würklich uf a Indoorparty gönd! Vorbei amene wunderschöne Waldbad sind mr denn bim Conrad Sohm aachoo. A ehemaligi Textilfabrik mitte im Wald amene Flüssli. Bald isch denn au mal dr Maxi cho und hät mit siina Tüacher a schöni Landschaft in dia Halle zauberet. Pünktlich zu Partybeginn isch au miin Chai fertig gsii und dHalle hät sich langsam aber sicher gfüllt. Dä Höhepunkt isch sicher am Cosmosis siin Live-Act mit Guitar gsii. Allei dä Bill wär scho än Grund gsii, zum dä Weg vu Chur ins Nachbarland unter dRäder znäh! Leider bini nid grad viel zum shake cho. Han viel ztua kah am Chaistand. Aber immerhin freie Sicht kah uf dBühni. Ziitewiis isch mr da Bill vorcho wia da Angus Young in siina beschta Jahre! (Hät nur no dSchualuniform gfehlt).
Aber au dä reschtlich Sound hät mir vu A bis Z zuagseit. Nach 10 Stunde stah und 20 Liter Chai-Uusschank bini denn au froh gsii, dass dia Party relativ früah fertig gsii isch. I hett sowieso kei Milch me kah zum wiiterkocha!

Zum Schluss möcht i mi no herzlich bedanke bi allne Beteiligte, allne voran Panta Rhei und dCrew vum Conrad Sohm. Und selbstverständlich bim Space!
Bi eu kummi sehr gern wiedermal go Chai mache!

Also denn, bis bald im Wald…mit sunniga Grüass us Khuur….Sam

Fotos online : http://www.panta-pro.ch


Panta Rhei prod.

Spacefreak