Jo isch ä mega schöni Party gsii!!
Dä Platz isch zwar fascht chli chlii gsii, für die vielä Lüt, aber d Gägend isch genial. Dä Sunnäufgang, dä See, d Hügel, d Bärgä, dä Wald, die ganze Bäum und Wägli uvm. eifach nur WOW..
Dä Shuttle isch am Obig scho chli überforderet gsii und mir hend denn halt s Taxi gnoh, zwar chli tüür gsii, aber däfür sind d Taxifahrer scho top informiert gsii. Üsä Fahrer wär am Liebschtä au grad zur Party cho
.
Dä Wäg zur Party isch zwar chli dunkel gsii, aber dank Taschälampe sind mer nöd über alli Stolperfallä gheit, hend aber däfür jenschti Müüsli ufgschreckt. Nach emnä Ziitli hend mer denn dä Sound au scho ghört und hends fascht nüm chönne erwarte bis mer endlich bi dä Party acho sind, hammer Sound gsii denn.
Hend üs denn zerscht mol äs hübsches Plätzli gsucht und äs Füür gmacht (Fichteholz isch super), was denn däzu gführt het, dass ca. 10 Lüt zu üs cho sind und gfunde hend, ob mir eigentlich spinned oder was.. Ähm, jo
.
Do mer denn Hunger übercho hend, hend mer s Füür chli loh usgoh und mol chli Würst brötlet. I hoffä dä wo mini reschtliche zwei Cervelats klaut het, het sie au fein gfundä *wuff*.
Das mit em Füür usgoh loh, het aber nöd klappte, well jedes mol wen mer wieder zu üsem Plätzli cho sind, öpper chli Holz druf do het. So hend mer jenschti Lüt troffä, wo sich i dä Nacht zu üsem Füürli verirrt hend und dötä chli Liecht und Wärmi gfundä hend *g*. Isch luschtig gsii, chli über Füür und Sternähimmel z philosophierä..
Dänn isch au scho bald wieder d Sunnä ufgangä und mer het die schöni Gegend gseh, äs isch so schön gsii, dass mer glaub dä grössti Teil mit umächillä verbrocht hend *gg*.
Im Sunnäliecht het mer denn plötzlich au no es paar vertrauti Gsichter gseh, sowieso isch's ä mega schöni, friedlichi, vertäumti Stimmig gsii. Jenschti Spaziergänger hend gfroget, was das denn für es Pfingstlager sig *lol*. Viellicht söt mer Goas in Zukunft als Lager deklarierä, i han also au en "Leiter 1" zum vorwiisä
.
S Deko und dä Chai isch übrigens au super gsii und dass d Orgs Abfallsäck verteilt hend, han i au vorbildlich gfundä. Sowieso es Kompliment ad Organisatore und es grosses merci, dass mir hend dörfä cho.
Und vielä Dank a dä, wo mer en Gumpiball gschänkt het
. Schöns Souvenir für die Party.
Dass am Morgä denn no wür an Shuttle zrugg fahre, dodämit het i nöd im Traum grächnet, aber cool dass ers anschinend gmacht het.
Aber Immesee isch jo voll nöd wiit wäg gsii und erscht no schön am See no. Blöderwiis hend mer so lang gmacht, dass üs grad no dä Zug vor dä Nasä abgfahre isch. Jähnu, mir hend eh nöd hei wellä
. Hend mer halt no äs Stündli dä See aglueget..
Wegem Ort womer het sölle warte chan i nur sege mit e chli gsundem Menscheverstand het mer sich ja chönne überlege, dass de Shuttle ned cha zwüsche dene chrüz und quer Parkierte Auto det obe cha hin und her fahre. Hoffe Ihr sind doch alli glich no guet Hei cho. 
