Vo däm här gseh fingenis irgendwie chline Widerspruch wede uf der einte Site seisch ja d Verantwortig ligt o bir Gsellschaft aber uf der angere Site si eh aui säubertschuld.
ig findees kei widerspruch woni gmeint han, aber villich hanis chli widersprüchlich gseit. so eppe mein egs:
in eusere gsellschaft gits en summe vo konverntione wo de mensche im lauf vo de zit zämegstellt worde isch damit mir euses lebe im iiklang mit em wohlbefinde und de interesse vo allne zäme choi organisiere.
die konventione sind nid perfekt und münd mit de sich ändernde wertvorstellige vo de lüüt au genderet werde.
das isch d pflicht vo der gsellschaft, settigi konventione (gsetz, umgangsforme, recht, pflichte, wert,kultur...) de aktuelle bedürfniss azpasse. das isch in gwüsser hisicht politik. Und so schöni begriff wie menscherecht, nöchsteliebi, sozialbewusstsii und all die tolle hippie schlagwörter sind eus nur durch soziali konventione geh.
Alles gute am menschen ist künstlich.
Der naturzuestand gseeht nemmli andersch us. i der natur esch jede för sech selber verantwortlech. das recht des stärkeren. und d natur isch s grundgsetz welles vo mir us gseeh zellt ob mer das wend oder nid. eusi mönschleche, künschtleche gsetz send nur denn und für dä gültig wo se akzeptiert und befolgt.
Dorum find egs widersprüchlich wenn epper wo die gsellschaft und ihri regle zersch verwirft und spöter wenn er gmerkt het das er allei z schwach esch zrückkrebst und sich uf genau die regle wo er vorher verworfe het sich berueft zom sich hilf z erschliiche.
Wenn me mit dere gselschaft nid klarchunnt cha me sin eigeti weg goh muess aber nid nacher no eppis vo dere gsellschaft erwarte wenn me ehrlech isch. Wenn me aber mit de gsellschaft unzfride isch und sini Verantwortig als mitglied wahrnimmt, denn cha me sich dra mache die gselschaft z verendere und mitzgstalte im eigete sinn.
Das isch au das wo eg als verantwortig vo der gsellschaft gmeint han. d gsellschaft het d verantwortig sich z verendere und aazpasse a die aktuelle verhältnis.
Doch wenn d gsellschaft nid guet gnue aapasst isch isch das ke rechtfertigung zom droge neh. so a la die bösi gsellschaft isch geg mich us trotz nimmi jetz droge. Ich, du, er, Mir sind alli d gsellschaft. wenn eppis mit dere nid stimmt liet d verantwortig be üüs das z endere. oder halt konsequent uus z stiige.
Natürli isch das alls vill z theoretisch und me chan nie so genaui grenze zieh i der realität wie eg das do gmacht han. natürli darf d gsellschaft gwüssne abtrünnige au helfe ihne verzeihe und sie wider in ihri reihe ineloh. sie het aber nid d pflicht dezue.
Vill mensche usem weschte rede immer vo recht (menscherecht...) aber d pflichte wo mit so recht entstoi vergisst me liecht.
In china zB isch es umgekehrt dört redt me meh vo pflichte als vo recht. was aber au nid guet isch, wie me am biispil vo ihrem rechtssystem liecht chan erkenne.
begründet dur mini vorhergehende ussage wörd eg säge das mer mensche kei pflicht hend anderne z helfe wo sich nid an ihri pflichte choi halte.
aber en wörklech guete mensch entscheidet sich för s richtige ob er en pflicht dezue het oder nid.