Was ist dir bei einem Mann wichtig?

[Fallen Angel 2]

Bi iifersucht gahts eigetlich au nöd um sex.
das isch nur dänn de fall wänn öpper främdgaht, wobii DÄNN gahs glaub ehner um verletzts vertraue.
Iifersucht isch eher d'angst dass de mensch womer doch so sehr liebt, uf eimal lieber mit öpper anderem zäme isch, und bliibe will.
das mer öpper verlürt.

Schmahu - ich find dini iistellig guet, und ich dänke, du chasch das sogar umsetze.
nur vergissisch du eis: es gitt verschiedeni manne. und es gitt sicher au manne, wo sich i dich verliebed, wänn du ihne nöcher chunsch - au wänn das nöd sexuell isch - aber DAS isch natürlich au bide "norm"-Bezihige de fall.
und da stellt sich natürlich scho d'frag: wie gönd die wo es paar sind demit um, wänn e dritti person im spiel isch?

ich glaube, das chan nur dänn guet gah, wänn alli es enorm guets selbstvertraue händ. sofern das nöd gewährleistet isch, chömed gedanke, wie "was hät de/die was ich nöd han" halt eifach uf.

es gitt es paar wenige mänsche uf dere wält, wo sich bewusst sind, das sie guet sind, so wie sie sind, und dass sie eifach läbe chönd und das ihres glück nöd vo anderne abhängig isch. nödmal voneme partner.

mir andere händ das no nöd ganz begriffe.

wänn du und din fründ das begriffe händ, schmahu, so isch das sehr guet, das isch nämli i mine auge FREIE Liebe (was wie gseit nöd um sex gaht), liebi wo nöd bunde isch an ideologischi konzept.

aber ich glaube es dürft rächt schwer wärde en typ oder e frau z'finde wo das genau so gsehnd wie ihr zwei. und somit blibed ihr enand treu - letztlich - will ihr die einzige sind, wo enand verstönd. würkli verstönd.

und das isch gar nöd mal so unähnlich wie das was die norm-bezihige so mached. sie händ 1 mänsch gfunde, wo sie verstaht. und sie bliibed mit dem 1 mänsch über längeri ziit zäme, sälbscht wänns främd gah würded, würdeds villicht wieder zämefinde, will nur de 1 mensch sie so verstaht, wie sie sind.

nöd alli mänsche verstönd alli mänsche...

[Melliandra]

@ FA

Hm... also ich känn doch es paar Lüüd, wo so dänked und läbet wie dShmahu. Gad i de Goa- Chreise.

Wenn das ganze nüd mit segs sell z'due ha, denn verstah ich sProblem nid. Klar wett ich au dass mien
Partner alles mit mier teilt und ich finde das schön, wenn ich ihm alles chan gäh. Isch das aber nid
de Fall und er chan nunmal irgendwas besser mit öber anderem bespräche/übercho, denn sell er das mache.

Oke viellicht verstah ich das ganze falsch... dShmahu red da ja vo verliebe. Also au en andere Ma chöne
z'liebe näbet de Bezieig. Was heisst denn Liebe? also da ghört für mich s'körperliche dezue.

Aber da chan wohl nur sie eus Antwort gäh.

[battlefairy]

mer trifft also en mänsch.. us de geischtige verbundeheit und de körperliche aziehig entstaat liebi. das klappt villicht ein zwei jahr lang, es isch ja gnueg nahrig daa... aber irgendwänn wirds routine: zum biispiil hät mer hät di geischtig wält vom andere bis in letschte winkel erforscht und bringt kei neui erkänntnis meh; oder d liideschaft zwüsched de zwei körper, wo sich in und uswändig känned, verebbt. mer liebt sich zwar no, aber routine setzt ii, d seel und d liebi hungered.

dänn begägnet mer wider eme mänsch. de mänsch treit e ganz eigeni wält mit sich ume. mer brännt druff, si kännezlerne; entweder interessiert eim de geischtig horizont vom andere, mer will uf de gliiche wälle schwinge. oder mer möcht dem mänsch körperlich nöcher cho und d liideschaft uusläbe. oder beides.. d seel verlangt nach neuer nahrig. mänsch, wo eim ja eigentlich vill wür bedüütet.. oder mer stirbt innerlich ab und isch nüme fähig, würklichi liebi z empfinde.

ich versuechs lieber so.. iifersucht empfindich au, klar, aber wänn ich en mänsch wüki lieb, dänn staat sis glück vor somene chliinliche ego-gfühl. und wänn die liebi wahr isch, dänn chunt de mänsch au immer wider zu eim zrugg.

und klar, min fründ mues di gliich iistellig haa, susch klappts nöd...

ich han zwar noni ganz alles i dem thread gläse aber das und ich han nur churz wele säge, voll geil!! Das hesch jetzt eifach uh guet beschriebe! Ich handhabes im Moment au so, ha das vorher scho gmacht, hami denn ufne "normali" Beziehig iglah und gmerkt, es funktioniert für mich ned, will mini Meinig au rächt uf das use isch, das wenn me ufne Mönsch trifft wo ein flasht, sigs körperlich oder geischtig, warum sött me das ned dörfe usläbe?
Irgend usme Grund isches ja so, dass so en "Magie" zwüsche zweine entstaht?!.. und klar, en Grund, das ned usdsläbe isch anschiinend, dass es ja denn de Partner schmärzt, aber werum? Das heisst ja ned dassen jetzt plötzlich weniger gern han.. da isch denn eifach en Verluschtangscht (au bekannt als Iversucht) da, aber ebe, ich stah da voll hinter dem bekannte Spruch "Ein Spatz landet nur auf deiner Hand, wenn Du nicht nach ihm greifst".. Wobi aber unbedingt dBewunderig zum Spatz mus fühlbar/merkbar sii.. de Spatz mus merke, dass er für Di was ganz speziells isch, indem en halt anstatt häbsch, eifach still ahimmlisch wie en Waldelfe en junge Baum oder so.. das spürter nämli!

Du hesch obe gschribe, das chan es Jahr zwei guet gha und denn isch die seelischi Nahrig nüm so ume und de chunt wieder öpper. Es chan aber au sii, dass mich de "erscht" oder wie au immer, immerno nährt und während dere Ziit öpper ander chunt womi au flasht, denn flashet mi halt zwei. Oder drü und ebe, was heisst scho Liebi? Das isch en grosse Begriff wo für jede chli was anderes bedütet. Ich finde sowiit, dasi absolut fähig bin, mehreri Lüüt ds liebe, ja, ich wür sogar sowiit gah, dassi chan säge, dassi zimmli sicher ned fähig bin, nur ei Person ds liebe... (ps: mus ned zwingend immer mit Sex verbunde sii!)

oh, sött mal chli afe worke, aber ich freu mi so mega fescht, dass es doch no einigi mit dem Gedankeguet git! Kenne ebe leider ned soo vili wo das irgendwie verstönd..

[Melliandra]

Mies Schnusel

Da wäremer nämlich gad bi de ander Frag. Gad dich battlefairy lieb ich nämlich au.
Aber das isch ja denn kei Bezieigsmissbruch, da du en Frau bisch und ich au. Aber dGfühl
sind ja au da zu dier. (Chichi jetzt wirds denn kitschig )

Aber Fraue döffed Fraue "liebe" aber en andere Ma denn nid? Also immer alles ohni s'körperliche
wett ich da betone! Isch eigendlich au blöd.... Das mit em Liebi vo Ma und Frau.

[Fallen Angel 2]

@battlefairy
sehr schön beschribe

@melliandra
jää das mit frei liebe isch so lang keis problem, wie e frau e anderi frau liebt (au körperlich) oder gar kei körperlichi berührig entstaht.

aber: sobald d'hülle voneme mensch is spiel chunt... wirds uf eimal kompliziert.

wo ich eifach chli es han isch: wieso isch e bezihig glichbedütend mit neme bsitzaspruch vom KÖRPER voneme bezihigspartner?

da verstahn ich verlust-ängst vill besser. also d'angst en partner z'verlüre, wenn er mit anderne schlaft oder umeknutscht, die andere chönted ja "besser" sii... etc.

das isch es denke, wo uf wertig (besser, schlechter) und besitzdänke (verlüre, bhalte) gründet.

ABER: au das sött mer nöd werte - dänn liebi isch nunmal nöd erchlär- oder definierbar. wichtig isch eifach das beidi de punkt genau glich gsehnd. wänn das nöd de fall isch, gitts vermuetlich früehner oder spöter stress. und zwar au dänn, wänn sich eine vo beide apasst...

was mer aber au no sött berücksichtige: mer chan ja au enand understütze, bzgl. wertig und bsitzdänke sozsäge d'auge öffne, dass das gar nöd umbedingt nötig wär.

wie au immer erzwinge funktioniert i keim fall. - und isch vermuetlich au de todessstoss für e bezihig. zwang und liebi sind sozsäge es antonym (gägeteil)

[Fallen Angel 2]

aso mit dem zwang mein ich: wenns für beidi stimmt, und beidi genau das mached was sie wänd, seg das jetzt körperlichi treui, geistigi treue, oder freii liebi, inklusive sex - dänn isch es guet (für beidi).

was de körper vom andere agaht, womer besitzasprüch erhebt: wo fangt das aa und wo hörts uf? isch e umarmig nöd au körperlich? was isch mit neme kuss ufs muul? zungekuss? sex? wo zieht mer da d'gränze?

au das müend beidi mitenand usmache - und: wänn eine vo beidne das andersch gseht, wie de ander - dänn isches chli schwierig.

[Tribalis]

Juw i dänke me cha nid alli beziehige glich setze. Für jede gitz z passende gägestuck. Aber mini liebe Vögelireielfli , was passiert wen es chind is spiel chunt, oder we er mit öperem zämme ziehnd ? Ich dänke freie beziehige sind es cools spielzüg, aber nid die wohri liebi-bezeihig-durchs-läbe-ga wel me sich immer es hintertürli offe lad.
Jede het die frei wahl was für ihn e beziehig isch, s wichtigst isch eifach das beidi vom gliche usgön

[Fallen Angel 2]

naja also es hindertürli laht mer sich nöd offe - schliesslich isch ja vo afang a klar, dass keine em andere ghört. zumindescht i de theorie - praktisch wird das villicht vo 12 lüüt uf dem planet tatsächlich so gläbt... aber under dene 12 lüüt isch es keis hindertürli, wänn du vo afang aa klarstellsch, dass du nöd besitzisch und nöd besitzt werde willsch. Es hindertüürli wärs ja nur, wenn du enand en ring um de finger wicklisch und aschlüssend mitneme scheidigsawalt s'grossi gäld machsch, oder das zumindest probiersch, will de eint oder die ander "främd gange" isch.

wieso münd mänsche immer alles "haa" und verlanget reparation wänns es nöd bechömed oder verlüred?

Treui isch i mine auge, dass mer enand treu isch - also loyal zunenand staht und fürenand da isch.

De Körper als Gegestand z'verwende, womer verchauft, verschenkt, verliebt, verlürt, benutzt, oder beschützt - naja...

Da besitz ich doch lieber das Gfühl, voneme andere Mänsch erkannt und verstande zwerde, was im Aug vom andere und villicht no i sinere mimik z'erkenne isch, wämmer eifach spüüüüüüüürt, und nöd dänkt (!), dass mer zäme "passt" - ideel, geistig, seelisch; wämer enand schön findt.

innerlich und üsserlich zunenand passt.

cha das dänn nur 1 person sii?

und wer gitt mir dänn eigetlich s'rächt, über e anderi person, sie als MINI person z'betrachte? doch wohl eher niemert!
....usser natürli je nachdem die ander person.

so betrachtet sind alli NORM bezihige uf unterwürfigkeite, uf erobert werde oder suscht was i dere form zruggzführe. eine will, die ander gitt nah. die ander will, eine lahnt sich erobere.

das isch doch kei wohri liebi - chönt mer jetz au säge...

und doch isch es halt für mängs lüüt vill meh liebi, als alles andere uf dere karge öde welt.

[Shmahu]

huiii, da ihne isches ja abgange... geil!


@melliandra
ich han zwar gschribe, es gaat nöd ums uuläbe vo "dringende bedürfnis" und es gaat nöd um sex... das heisst, es gaat nöd drum, dass ich eifach spitz bin uf öpper und drum mit dem sex han. in erschter linie gaaz umd liebi woni empfind. die liebi chan sich uusdrucke, indem mer vill ziit mitenand verbringt, vill anenand dänkt, villicht gern mitenand kuschlet, villicht sex hät. d gränze sind flüssend, es mues nüt usgschlosse werde.

dini frag bezüglich em underschied zwüsched de liebi vo maa und frau und frau und frau (grässliche satzstellig, sorry) findi super... ich nimm jetzt mal aa, dass d biologie eus antwort druf git.. vonere frau gaat für en maa kei befrohig us...sis "wiibli" wird sich trotzdem mit ihm fortpflanze welle, au wänns e anderi frau liebt... wänn sie sich aber in en andere maa verliebt und denn au no sex mit dem hät, dänn huiii, trülled d hormon dure.

eusi gsellschaft understützt de mechanismus... eus wird vo chlii uuf gseit, dass eusi biologie i dere beziehig "rächt" hät, dass mir srächt händ, besitzaspruch a öpper z mälde. es wird sogar idealisiert.

mir sind aber wese, wo bis zume gwüsse grad "über" eusere biologie chönd staa. eus wird z.b. atrainiert, öpperem nöd eifach öppis wegznää, wo mir au gern hettet. oder uf eusi linie z achte, obwohl mir am liebschte masslos würed iestopfe. und es git au kulture, wo polygamie normal isch, sowohl für manne als au für fraue.

mis ziil isches, die gsellschaftlich konditionierige us mim hirni zkicke, wo mer nöd passed und wo mich vom liebe abhaltet.


@fallen angel
wied melliandra scho gschribe hät, giz vili mänsche mit dere iistellig. min "fründ" (oder wie mer das au immer näne mag) und ich sind da bi wiitem nöd di einzige. all mini beziehige i de letschte foif jahr händ uf dere philosophie basiert.
was du no gschribe häsch bezüglich de manne, wo sich i mich verliebe chönted... grundsätzlich gaaz ja ebe umd liebi. umd liebi treit sich ja alles..
die einzig gfahr bestaat drin, dass mer zersch sonere "freie" beziehig zuestimmed, will mer ja ebe verliebt und zu allem bereit isch, ohni sich wüki bewusst drüber zsii uf was mer sich ilaat. und dänn, wänn öpper andersch is spiil chunt, chunt plötzlich d verluschtangscht und abhängikeit as liecht und es wird unheimlich schmerzhaft. i de theorie tönt das alles super, i de praxis isches um viles schwiriger... aber für mich isches trotzdem de einzig richtig wäg, liebi zläbe.

@battlefairy
danke... das hät guet taa... und din letschte satz: "Ich finde sowiit, dasi absolut fähig bin, mehreri Lüüt ds liebe, ja, ich wür sogar sowiit gah, dassi chan säge, dassi zimmli sicher ned fähig bin, nur ei Person ds liebe... (ps: mus ned zwingend immer mit Sex verbunde sii!)" findi de absoluti hammer!

[Melliandra]

Isch mer gad no was in Sinn cho. Hed das ganz nid viellicht au mit sehr viel Sälbschtvertraue zdue?

Ich meine, Shmahu ich weiss nid wie du usgsehsch, aber ich chönt mer vorstelle dass es für dich nid
schwirig isch, wer z'gfinde wo dich fläscht und umgekehrt. Aber was isch wenn öber halt das nid so
guet chan? Ich glaube de wird umso meh a öberem hange, wenns denn mal klapped oder passed.

Hed das nid was mit Efahrig z'due? Sägemer mal öber isch sehr verschlosse oder schüch oder weiss
nid was, hed en Bezieig und wird entdüscht. Denn wird er no meh verschlosse und wenn er sich denn
öffnet denn will er die Person für sich, will er dere Person ja so viel vo sich gäh hed und au de Halt
und dSicherheit vo dere Person brucht, wenn das denn wieder entdüscht wird, denn wird das immer
schlimmer, die Peson immer chlammernder und wird so no ehnder wieder entdüscht.

Ich glaube ebe das hed somit sehr viel mit de eignige Freiheit z'due. Schaft mers so zLäbe wie du
seisch Shmahu, denn chamer losla und isch frei. Es duet denn au weh öber z'verlüre aber mer hed sich
nid mit Erwartige und "Opfer" a 1 Person bunde. Hm... gad speziell wenn ich mier das so überlegge.

Andersietz, ich bin en Mänsch wo mega gern gid und natürlich umso meh freud han, wenn ich öber finde
wo vo sich us au so gern gid. Wenn ich verliebt bin, denn find ich de Mänsch so speziell und passend dass
ich gar keis Bedürfniss han miteme andere Ma über es guets Gspröch us z'gah.

Wenn sich denn no Liebi drus entwicklet denn findi das no viel schöner. Ich findes au nie sälpschtverständlich,
dass öber a minere Siete isch! Finde immer wichtig, dass mer das nid als normal oder ebe sälpschtverständlich
a lueged.

Hehe sorry Chinde bin wirklich eifacht über beidi Ohre verliebt und drum hani jetzt gad müesse schmunzle
über mini Gedanke, will es passt eifacht so wies isch bi mier. Eigendlich giz gar nüd zäge a dere stell.

Ussert es mega big *Knuddel* a euch alli,
bsunders as Schnusel und es mega MERCI
das dich gid, a mien Kobold.

[Amanita]

Jo, das hesch du schön gseit .

[souris]

Gwüssi Ussage sind für min Gschmak chli seehr eifach gmacht!
Und ich bin au immer weniger 2 geteilt, will ich für mi merke, dass es eifach nöd ehrlich isch.

@shmahu, welli gsellschaftliche konditonierige hinderen dich am liebe?? Uf dia antwort wäri würgli gspannt.

Ich chönt mer vorstelle, dass es wohl eher euses denke isch, üsses nia endende "wollen"! Cha das würgli de wäg si, je nach stimmig suachi mir de ma us, wo gad passt? Sorry aber es chunt mer chli so vor. Hey nei, mir isch es glich, ich verurteile au niamer. Leben und leben lassen. Aber das isch für eu liebi? Wärs den nöd besser eifach "singel" zsih?
Sorry aber irgendöppis gaht jetzt grad überhaupt nöd in min kopf ine....

[Shmahu]

liebi souris, wie chunsch du druff, dass es drum gaat, mir je nach stimmig en maa uuszsueche? wänns so übercho isch, dänn hani mi entweder falsch uusdruckt oder du lisisch nöd gnau...d frag, wo du mir stellsch, hani scho zigg mal beantwortet, aber ich widerhol mich gern nomal:

ich liebe en mänsch und verbringe ziit mit ihm. ich find ihn absolut wunderbar und unersetzlich i sinere persönlichkeit.
gliichziitig wachst mini liebi zumene andere maa. und de mänsch isch völlig andersch... mit ihm teil ich öppis anders, eusi gspröch dreiet sich um anders, mir "schwinged" völlig andersch.

mini gsellschaftliche konditionierig seit jetzt: du muesch dich entscheide... aber wieso? mini liebi zum einte mänsch hät überhaupt nüt mit minere liebi zum andere ztue! da isch kei konkurränz, mis herz isch gnueg gross für beid. wieso wird ich dezue zwunge mich z entscheide, wonich doch beid lieb? ich nimm ja niemerem irgendöpper weg (was ja sowieso nöd gaat, will mer en mänsch nöd chan bsitze)....
hät irgendöpper würkli öppis vo dere entscheidig usser euses ego?

du redsch devo, dass mir alles wänd... di meischte mänsche wännd en mänsch bsitze, sie wänd ihn "für sich elei"... das isch für mich kei liebi.

[Kollegoli]

@souris

wieso denn singel sii?

liebi gegenüber mensche isch ja im prinzip frei, die chunnt eifach, unnabhängig devo ob mir wennd oder nöd, da hämir relativ wenig zsäge.

Cha das würgli de wäg si, je nach stimmig suachi mir de ma us, wo gad passt?

es gaht doch nöd um ussueche. es gaht um frei id welt use liebe. liebi, womer gegenüber emene mensch verspührt au in volle züg versueche uszlebe, frei vo allem. nur wellmer mit öpere zämecho isch, enere gwüsse person also mega nöcher cho isch, heisst doch das nöd, dassmer jetzt automatisch e pflicht hät, nur no de zliebe. es isch doch normal, dass eim au no anderi mensche fasziniered, wenn villicht au ersch nacheme ziitli wieder, und mer au dene gern nöcher cho wür. me hät doch nöd nur srecht, nur öperem nöch zsii und gegenüber allne andere mensche e gwüssi distanz zwahre. es macht doch kei sinn zsäge "hey sorry, ich liebe dich ja eigentlich, unglaublich sogar, aber ich han au no sbedürfnis andere mensche nöcher zcho, deswege tschüss".

gsellschaftlichi konditionierig wo eim am liebe hindered: be de menschheit liebed sich immer nur 2.
das entspricht nöd de realität. es mag zuetreffe, muss aber nöd.

wieso söllmer "singel" sii, wennmer verliebt in öper isch und die liebi uf gegesiitigkeit berueht?

[Shmahu]

liebi melliandra, ich find dini gedankegäng super und ich freu mich mit dir drüber, dass du verliebt bisch..

was du schriibsch stimmt natürli... en mänsch wo wenig sälbschtwertgfühl hät und inere beziehig ganz vill schutz und halt suecht, dem gaat sone "freii liebi" ganz sicher gäg de strich, will d angscht vorem verluscht eifach zgross isch.
ich find, i eusere wält giz z vill mänsche, wo ihre eigeni wert nöd känned, wo sich nöd gliebt fühled. so mänsche entstönd (under anderem) us familie, wo d liebi zwenig flüüsst. si werded erwachse und will si sich sälber zwenig gliebt fühled, sueched sie die bestätigung inere beziehig. und obwohls i villne beziehige vorchunt, dass d liebi nacheme ziitli stirbt zwüsched all de entüüschte erwartige und unusgläbte wünsch (mini meinig), enstönd us dere verbindig chind, wo ime liebesarme umfäld ufwachsed. sie werdet erwachse und....de chreislauf gaat ändlos wiiter.

das isch nur en teilaspäkt vo allem und mini bescheideni sichtwiis...ich weiss, es git no tuusig gründ, wieso s zwenig liebi uf de wält git. und ich will au überhaupt nöd behaupte, dass alli beziehige nachem konventionelle schema nöd funktioniered. ich lueg eifach id wält und gsehn e zgrossi azahl a scheidigschind und zvill unglücklichi beziehige. wieso isch das nur so?

du häsch no öppis interessants gschribe: "Ich meine, Shmahu ich weiss nid wie du usgsehsch, aber ich chönt mer vorstelle dass es für dich nid
schwirig isch, wer z'gfinde wo dich fläscht und umgekehrt. ". ich han zimli müse schmunzle woni das gläse han, will ich uf kein fall zu de klassisch hübsche fraue ghöre wo d manne druf stönd... ich gsehn zimli luschtig uus... es stimmt aber, dass es immer wider manne git, wo mir wänd ufere tüüfere ebeni begägne. liebevolli mänsche, wo sich vo dere freiheit azoge fühled und au de wunsch händ "frei id wält use liebe" (eifach en mega schöne uusdruck oli, merci).
d angscht seit eus oft: "wännd nöd feschthebsch, dänn bisch elei". nach minere erfahrig isches genau umgekehrt.