Chamer öper helfe??

suchst du eine passende goaliebe dann suche sie hier?
neurotransmitter
Beiträge: 1
Registriert: So 8. Jun 2008, 20:30

Chamer öper helfe??

Beitrag von neurotransmitter »

Chönnt bitz Hilf bruche..

Ich bin Endi Februar anere Party fast ines wunderschöns Fraueli inegloffe womi denn mitem bezaubernste Lächle agsmilet het woni je gseh ha... hamich denn au di ganz Party lang nüm chönne zrugghebe, ihre immer wieder schüch nochezluege und hättse liebend gern agsproche, hami aber natürlich nid getraut. Ha denn 3 Wuche Ziit gha mich über mich selber ufzrege bisi anere andere Party wieder fast inse inegloffe wär.. Natürlich bini wieder völlig unfähig gsi, meh mit ihre z'kommuniziere als errötet wegzluege wenn sich unseri Blick zuefällig troffe hend.
Drfür hetsis gschafft, mich mit ihrem amuetige Tanze, ihre schüche Blick und ihrem Lächle völlig in Bann z'zieh...
Ha nach dere zweite Party praktisch an nüt meh anders chönne denke, obwohl ich ja gar nüt se weiss (hetmi scho bitz vrwirrt), hamer denn au vorgno si s'nächstmol azspreche fallsi se wiederseh (woni überzügt drvo gsi bi).
Es isch denn vor paar Wuche drzue cho dassi se es dritts mol gseh ha, aber denn isch no so en Typ ume gsi wo ihre eher Nöch cho isch (villicht au nur fründschaftlich, glaub nid dass si zeme sind (oder gsi si sind denn)), aber uf jede Fall hetmer er dr ganz Muet woni mer dehei zuegredet ha wieder klaut und ich han bis hüt no ke Wort mit ihre gwächslet..
Ich will die Frau unbedingt immerhin bitz kennelerne, aber ich han kei Möglichkeit mit ihre irgendwie Kontakt ufzneh.. cha nur hoffe dassi se mol wieder anere Party seh, aber was sölli denn säge?
Und wie sölle ihre z'verstoh geh dassi nid eifach irgenden Typ bi wo druf isch und sie geil findet und will abaggere..?

Bin eigentlich nid so dr Typ wo uf wildfremdi Fraue stoht oder so.. aber es schwirre sit über 3 Mönet viel z'viel Gedanke über sie i mim Kopf ume als dassis chönnt missachte...

Was sölli mache?





merci im voruus
blaues hufeisen
Platin Member
Platin Member
Beiträge: 314
Registriert: So 25. Nov 2007, 20:22

Re: Chamer öper helfe??

Beitrag von blaues hufeisen »

olla,

ich rate dier us eigener erfahrig, s'nächschte mal wenn du sie gsehsch, mit ihre ds rede.
en ratschlag zum amache chani dier aber ned gäh - s'würd ned so guet use choo #-o 8-[

Wenn du so bliibsch wie du bisch, hesch die beschte charte. du dörfsch schüüch sii ond du
dörfsch au knallrot wärde wenn du mit ihre redsch. ich dänke mal, das zeigt, dini ehrliche absichte
ond dass du dier würklich gedanke über sie machsch.

ich glaube ned, dass sie nüd vo dier will, nume will du nervös gsi bisch. überleg emol, wie das isch,
wenn en Frau dich wäge irgendöppisem aspricht.

Rein us dem was ich erläbt han, isches besser mit ihre es gspräch ds sueche als abwarte ond tee trinke.
ich tröte han mi nämlich au mal i öpperin megamässig verliebt ond eso ganzi 3 johr numeno a sii dänkt anstatt mich ds überwinde ond au mal übere eigeti schatte ds gumpe. glaub mer's s'gid nüüd schlimmers als NÜD mache.


=D> =D> =D> also, go for it! =D> =D> =D>


ah jo, weiss ned wie's bi dier isch aber ich dänke es wär besser, ned "druff" ds sii i dem momänt. dis härz söll spreche - es isch denn eh voll im delirium ond din puls uf 200 ond ond ond... (die schönste freude ist die vorfreude, hehehe)
take your dress, burn it and come to me. let me be your skin, feel your dream come true, inside you
piraña

Re: Chamer öper helfe??

Beitrag von piraña »

de name findi no luschtig.

was ich nideso luschtig find, isch, dass a partys i fraue ielaufsch - me cha sich au zämmerisse (aber nid hüüle-sett en witz si).

gniess de zauber, de sie i dir uslöst, denn, wemmer all zauber vo dere sorte uf es ganzes läbe uerächnet, so chönts viellicht si, dass mer stuunt, wie sälte sie underem strich sind.

dir hälfe chani glaub chum, denn wie gross mini klappe au si mag, so sälbschtbewusst ich au mag tue - es git sie trotzdem no, die fraue, bi dene ich mir so chli vorchome, und mich frage, warum ich nid cha en eifache satz useloh - eine wo möglichscht no sinn mache würd.

wäge de ziit würdi mir ke sorge mache - es git au dubble, die sind scho länger verliebt als de huufise das gsi isch, und hend nid scho nach paar mönet um root bätte.

es git sie au, die art vo zauber, die mer zauber sett loh si, denn süscht holt eim de alltag so schön i, und zeigt, wie wenig zauber glichziitig näbe ihm cha bestoh. verliebt bini ja scho lang, und ich wär es wohl chum no so, wenn ich vor füf johr über min schatte gumpet wär, und alles uf ei karte gsetzt hätti. vermuetli hätti mir das ganze scho lang irgendwie vermasslet - so wie ich mich kenne - denn, wenns würkli umd würscht goht, de hätti glaub doch lieber es sandwich.

was ich dir mit dem wett säge: mer cha au wunderbar liebe, idem mer mal sis ego chli zruckschrubt, und liebt, ohni dass mer da grad en gägeleischtig defür erwarte tuet. du döffsch dir jetz dänke: was isch jetz das für en spinner?, aber d liebi zu öperem cha über d johre wachse, au wemmer lang, lang nid drüber redt, oder nüt macht. es git momänte, i denne ich sie am liebschte würd go hole, und eifach zo mir nä. es git aber viel meh momänte, i dene es mir wichtiger isch, dass sie glücklich isch - au wenn nid ich däjenig bi, wo sie glücklich macht.

ich meine - du hesch sie zwoi drü mal gse. jetz stell dir vor, du würsch sie no zwoi-drühundert mal gse, und au wenns nid würkli merksch, so wachst d liebi viellicht bi jedere begägnig wiiter.

uf jede fall bruched beidi wäg muet. drüber rede isch en so schlächti idee nid - aber du ghörsch glaub nid grad zu dene, die de muet i dere beziehig mit löffle hinderegschletzt hend. d unsicherheite hend ihri gründ, und - jetz würd mer jede nhp-ler rächt gä: wemmer s uchrut wett usem garte vertriebe, de muess au d wurzle wäg. so au d unsicherheite.

zo üsem glück gits au fraue, die das unsichere süess a eus chönd finde - aber vorsicht: nid ufd duur.

ich has minere übrigens nach vierehalb johr de verzählt, wies um mini gfühl zo ihre stoht. das het üses verhältnis nid verschlächteret, sondern bericheret. aber au nach so langer ziit gits öpis, das mir angscht macht: ES wird immer stärker 8-[

viel glück bim nöchste träffe! aber, wenn i ehrlich bi - weder du no ich sind de letschti ma uf ärde, und das würd s ganze au nid eifacher mache ;)
Benutzeravatar
Saphira
Platin Member
Platin Member
Beiträge: 628
Registriert: Sa 19. Mai 2007, 19:59
Wohnort: CH

Re: Chamer öper helfe??

Beitrag von Saphira »

Piraña, irgendwo hani vo dir scho mau über die Frau gläse. Es isch eigentli e schöni Gschicht. Die Frau darf sich ja sehr geehrt füehle, dass si über Jahre hinwäg e Maa so cha fasziniere. Aber läbt die Faszination nid meh nur i dinere Vorstellig? Es isch zuegäh grad chli schwirig für mi, mir das vorzsteue. Vorauem, we du di säuber aus verliebt i die Person bezeichnisch. S Bedürfnis, dere Person nöcher z cho, s zmingscht versueche, würd gloub bi de meischte überhand nä. Aber we das so für di stimmt, de isches guet.

De Threadstarter aber wird sich vermuetlich nid mit däm chönne z Fride gäh. Und er hätti ja scho mau fasch e Versuech gstartet, wenn ihn nid de Muet wägemne andere Maa verloh hät. Bim Aspräche chöimer der äuä nid gross häufe. Aber z nögstemau geisch eifach mau häre und wächslisch es paar Wort mit ihre. A Partys gits ja gnueg Theme, wome drüber cha rede. Steuere e offnegi Frag, wo si nid eifach mit "ja" oder "nei" cha beantworte. Plötzlich isches z spät und es git kes "bim nögschte Mau de" meh.

P.S: So viu zur Theorie, i weisses säuber, ir Praxis funktionierts nid immer. Aber i hoffe, mer chöi der gliich chli Muet mache :)
-(°_o)/¯ ┐(-。ー ┌ ヽ(´ー`)ノ ٩(͡๏̯͡๏)۶ ٩͡[๏̯͡๏]۶ ͡๏_͡๏ ٩(●̮̮̃•̃)۶ ≧△≦ 凸'へ'凸 ☽ (°ロ°)☝ ε(●̮̮̃•̃)з
piraña

Re: Chamer öper helfe??

Beitrag von piraña »

Saphira hat geschrieben:Piraña, irgendwo hani vo dir scho mau über die Frau gläse. Es isch eigentli e schöni Gschicht. Die Frau darf sich ja sehr geehrt füehle, dass si über Jahre hinwäg e Maa so cha fasziniere. Aber läbt die Faszination nid meh nur i dinere Vorstellig?
klar...welli faszination läbt scho osserhalb vode seifeblose, die mer as üsi vorstellige vermuetid...sogar langjährigi, härkömmlichi ehene gründet uf irrtümer und missverständnis. s pulver wär viellicht nor scho verschosse :D
*SunnY*
Silver Member
Silver Member
Beiträge: 112
Registriert: Fr 18. Mai 2007, 16:36

Re: Chamer öper helfe??

Beitrag von *SunnY* »

ui wie schön*

dann beschreib sie doch! beschreibe ihr aussehen und die parties wo ihr euch getroffen habt!

vielleicht kennt sie ja jemand, oda sie erkennt sich selbst!

wäre doch ein versuch wert!!

ich wünsche dir gutes gelingen***
°°*ein tag ohne lächeln ist ein verlorener tag*°°
battlefairy
Platin Member
Platin Member
Beiträge: 288
Registriert: Fr 14. Jul 2006, 23:15
Wohnort: Allenwinden ZG

Re: Chamer öper helfe??

Beitrag von battlefairy »

piraña hat geschrieben:ich meine - du hesch sie zwoi drü mal gse. jetz stell dir vor, du würsch sie no zwoi-drühundert mal gse, und au wenns nid würkli merksch, so wachst d liebi viellicht bi jedere begägnig wiiter
:-k hmm, das kenni zwar au (nid grad "Liebi" aber ds "Verliebtsii" wo sich steigeret, nur scho vom gseh här) und japp, das chan passiere und au wunderschön sii, ABER: so lang SIE nid irgendwie au nur es Fünkli af "Dich" (also i dem Fall jez ufe Neurotransmitter) ufmerksam wird, isch das nur uf de einte Siite und was bringts denn, wenn das wachst, ohni dass sie mitwachse chan? Denn steigeret sich die Liebi zu dere Frau (villich is unermässliche) aber und denn?! ihre das nach 3 Jahr säge? Und denn usegfinde dass sie unterdesse ghürate hed und im 4 Monet schwanger isch? jääää [-X
aber wenn Du, Neurotransmitter, chasch irgendwie bewirke, segs dur en innige Blick mitme Lächle (wo mind. es Gägelächle ihrersiits erforderet) oder au nur paar Sätzli pläuderle, dass sie uf Dich ufmerksam wird, denn chan das au für sie zueträffe, dass au bi ihre das Verliebtsii vo mal zu mal wachst und plötzlich bäng! Ligged er eu ide Arme und fraged Eu, warum ier eu nid vor 2 Jahr scho verlobt hend :-D ja, nein, scho klar, das isch jez bitz überspitz, aber chönnt ja sie? Bild
Aber ds lang warte und nüd säge unterstützi jez au ned so unbedingt, will ja, wer weiss, villicht bisch ja nid ihre Typ oder so, oder ebe, sie isch scho liiert und denn chasch das au anäh und Dini Härztüürli wieder chli wiiter öffne für neus und anderi wundervolli Fraue wo Di wärde verflashe...

U never know Bild

ps: und was chasch scho verlüre? han das au scho botte, dasi zu eim hänegstande bin, wo mir gfalle hed und mir Schmätterling in Buch gäh hed und hanen mit irgend emene Stumpfsinn aquatsch, und bin denn mit hochrotem Chopf wieder devozottlet und dänkt: #-o so doof, hättsch gschider dSchnorre zueghebt, de meint jez au, ou mann.." und denn, ich fass es kaum, ade nächste Party hani de wieder troffe, und was passiert, ER seit MIR hoi, nur wili ihn letscht mal au aquatscht han und somit scho mal en Verbindig, wie munzig die au gsi isch, aber isch döt entstande gsi und dismal hemmer denn es mega easy und kuhls Gspröch gha, und es isch völlig irrelevant gsi, dasi letscht mal (nach minre Meinig) wienes dümmlichs Fuseli voren angestande bin :-D nur so am Rande, um dHoffnig nid la stärbe lah und de Muet bitz asporne
/happy
*singhüpftrallalaa*
Benutzeravatar
Nachtwandler
Gold Member
Gold Member
Beiträge: 162
Registriert: Mo 31. Mär 2008, 11:11
Wohnort: Luzern
Kontaktdaten:

Re: Chamer öper helfe??

Beitrag von Nachtwandler »

:lol: sorry... aber ja ebe :-D
piraña

Re: Chamer öper helfe??

Beitrag von piraña »

i wett nid demit säge, är sell warte...ich wett demit säge, dass, au wenn sie bsetzt isch (was für en wc-mässige usdruck :roll: ), es immer no möglich isch, uf sie zwarte. wenns ächt isch, unds e so chonnt, wies sell (es chonnt immer alles wies sell), de isch es au nach füf johr nid zschpot, umd karte ufe tisch z legge. oder d würfu lo gheie :-k

es isch halt scho no e doofi tatsach, das die fraue mit de bezauberndschte lächle au die sind, die so sälte mal z ha sind (was für en kaufhuus-begriff :roll: )

es gits ebe au, dass mer öper liebt, und trotzdem mit öperem zämme isch, obwohl da öper umme isch, wo mer no meh liebt.

ich goh nid devo us, dass ihm sini agbäteti bsetzt isch, aber, es cha ihm nid schade, das bim nöchschte mal go z erforsche. veillicht find sie: wau - ich hätt au dich welle kennelerne, hami aber nid getraut. wenns aber würkli die isch, mit em bezauberndschte lächle, de sägi: viel glück! so fraue ziehend tüpe normalerwiis a wie scheisse d flüge.
Benutzeravatar
halucinognom
Platin Member
Platin Member
Beiträge: 655
Registriert: So 18. Mär 2007, 09:27
Wohnort: fast genau am Strand !!
Kontaktdaten:

Re: Chamer öper helfe??

Beitrag von halucinognom »

wenns aber würkli die isch, mit em bezauberndschte lächle, de sägi: viel glück! so fraue ziehend tüpe normalerwiis a wie scheisse d flüge.
.....und wo de zletscht öbbis vo eim wot....froue, wo eim nume wei verzoubere, chlei spass ha und denn lo 'keie'....

(jojo gits o 8-[ )


(aber zum glück nid aui)

(und jez bitte nid fausch verstoh, mag frauen sehr O:) )
Benutzeravatar
Nachtwandler
Gold Member
Gold Member
Beiträge: 162
Registriert: Mo 31. Mär 2008, 11:11
Wohnort: Luzern
Kontaktdaten:

Re: Chamer öper helfe??

Beitrag von Nachtwandler »

ja sorry nomal.... has ned bös gmeint mis :lol:

Nei, wer kennt das ned (oder emol so ähnlich), ich scho *übersichselbstlach*
Jetzt nach ihre z`sueche und sich tuuusig Gedanke mache bringts ned... machsch der nume s`Läbe schwer! Und vielleicht hett si di ja wirklich nume welle chli verzaubere (was si ja anschiinend gschafft hett). Wenn sie wieder gsehsch, denn sprich sie ah (bis offe aber ned ufdringlich! nur so gfindsch es use) und wenn das ned chasch und sie au ned will/trout oder es eifach ned klappet, denn muess es au ned so si.

"Es hett no mängi Muetter en schöni Tochter" hett mis Grosi immer gseit :lol:

Ich wünsch dim Härzli gueti Besserig
Benutzeravatar
Elias
Platin Member
Platin Member
Beiträge: 757
Registriert: So 13. Aug 2006, 08:34
Wohnort: da

Re: Chamer öper helfe??

Beitrag von Elias »

es isch halt scho no e doofi tatsach, das die fraue mit de bezauberndschte lächle au die sind, die so sälte mal z ha sind (was für en kaufhuus-begriff :roll: )
Es bezauberends lachle isch immer z ha... 8-[

Uf de andere site, isches scho chli trurig, wann öper jarelang, bezaubernd lachled, und jarelang elai hai gat (meistens hai) und sich dan, dihai elai, fühlt.

Schönhait chan au en fluech si,
mer isch wunderhübsch, alli gsend das, und mer muess sich dan au so verchaufe,
mer hat ja en ruef zpflage!
„was tanked acht die andere“ „bini hübsch gnueg“ „sitzt mini hose na“ usw

Und mir manne sind oft racht faig, grad will mir üs fo dere,
üssere schönhait, so blande lönd.
Was de aghimelte gagenüber au nöd immer fear, isch.
Klar si wais das si hübsch isch, wais aber au das si schön isch, als ganzes.

Und wan mer en chorb kassiert, ja und? Was söls???
Vilicht hat ja die aghimelti aifach grad de fade verlore,
will si abaggered wird und reagiert halt genau so wie si aigentlich gar nöd reagiere wil.
(blockadene chan mer überwinde, das isch schöne am labe)
Es brucht halt mangisch me als eis schüchs, amach versüechli...

So und jetzt gani go fuessbal luege hehe
http://www.vimeo.com/elfilmias
http://www.youtube.com/elfilmias

Wage du, zu irren und zu träumen! Hoher Sinn liegt oft in kind'schem Spiel.
(Schiller)
Benutzeravatar
Ka
Silver Member
Silver Member
Beiträge: 118
Registriert: Mo 14. Feb 2005, 16:16

Re: Chamer öper helfe??

Beitrag von Ka »

"Es hett no mängi Muetter en schöni Tochter" hett mis Grosi immer gseit :lol:

Isch das itz ä Fluech oder ä säge? ... :cry:

Also i würds versueche, oder mir emel vornäh se azspräche. Mach dr erscht zug, wie im Schach, dr buur fürestellä u när abwarte wie si reagiert, la di uf das spiel i, aber machs mit Taktik (und Taktgfüehl). Frag se öppis (wie schomal erwähnt) wo si nid cha mit ja oder nei beantworte, und de merksch zimli schnäll wie das Spiel lauft, ob chance hesch, ob alls nur ibildig gsi isch oder ob das lache so vil bedütig gha hett, wi du dir vorgstellt hesch. U falls si när ihre zug macht wo di zum nächste useforderet, fahts plötzlich a laufe und wär weiss vilech liget ier öich scho bald ide arme^^
u klar, äs geit när immer witer, u mi cha gäng, i jedem moment "verliere", dür chlinikeite, aber i säge mer de: "wenigschtens hanis probiert", u mit däm wonis verspielt ha, das nimmi i mi rucksack u maches bim nächste mal besser...oder anders) às wird mir bewusster und i lehrä mi so kennä, was nid immer eifach znä isch...

Ou das tönt sehr eifach, u so als hätti keni gfüehl, aber äs isch mini erfahrig u i muess das so aluege, susch wäri scho lang drufgange...
:cry:

Vil glück!
Revolution is Evolution!
Fallen Angel 2

Re: Chamer öper helfe??

Beitrag von Fallen Angel 2 »

aso ka ig weiss dä niid...

liebe als taktisches spiel.

hm.

wird vermuetlich scho meistens so in etwa uf das uselaufe.

ich frag mich halt eifach (und du vermuetlich au)

gits dänn, die romantischi liebi mit glöckli, neme sunnestrahl wo zwei erlüchtet, wo sich grad ufnere
kleeblattliechtig träffed, sodass d'endorphin und pheromon spriessed wienes glücklichs maichäferli,
nöd?

wieso verliered so mängs lüt wäge so chlinlichkeite wo doch so chlinlich sind gägeüber de liebi wo chönt sii, wo möglich wär?

nur mal so e "theologischi" (nach definition müstik) frag...
Benutzeravatar
Ka
Silver Member
Silver Member
Beiträge: 118
Registriert: Mo 14. Feb 2005, 16:16

Re: Chamer öper helfe??

Beitrag von Ka »

Fallen Angel 2 hat geschrieben:aso ka ig weiss dä niid...

liebe als taktisches spiel.

hm.

wird vermuetlich scho meistens so in etwa uf das uselaufe.
ich frag mich halt eifach (und du vermuetlich au)

gits dänn, die romantischi liebi mit glöckli, neme sunnestrahl wo zwei erlüchtet, wo sich grad ufnere
kleeblattliechtig träffed, sodass d'endorphin und pheromon spriessed wienes glücklichs maichäferli,
nöd?
Tröimt da nid jede derfo so öppis zha, wie du das beschribsch? S'wär würklech schön... aber entweder isch diä zyt verbi, oder aber shetts gar nie gä, usser im märli^^
Revolution is Evolution!
Antworten